నిజానికి ...ఎలాంటి పద్ధతులైనా , నమ్మకాలైనా , అలవాట్లైనా ..

 నిజానికి ...ఎలాంటి పద్ధతులైనా , నమ్మకాలైనా , అలవాట్లైనా ....ఎవరివి వారికి సొంతమైనవి ....ఆమోదించదగ్గవి ...

అవి ఎప్పుడు మనకి ఇబ్బంది కలిగిస్తాయంటే ....

ఆ పద్ధతులు వారు అనుసరిస్తున్నారు కాబట్టి ....ఇతరులంతా అవే అనుసరించాలని ....అవి పాటించని వాళ్ళు దుర్మార్గులని ....దుష్టులని ....వాళ్ళని నిందించడం ....

ఆ పద్ధతులు అనుసరించేదాకా వారిని అదే పనిగా దూషించడం చేస్తే ....అప్పుడు వారితో సమస్య ....అది వారితో పరిచయం కొనసాగించడానికి ఇబ్బంది కలిగిస్తుంది ...

నీకో / నాకో ఒక నమ్మకం ఉండొచ్చు ....అది ఎదుటివారికి మూర్ఘత్వంగా అనిపించవచ్చు ....

కాదు నేను నమ్మాను కాబట్టి ....నువ్వు కూడా నమ్మాల్సిందే అని మొండిగా వాదించడం ఎంతవరకు సమంజసం ....

అది దేవుడు కావచ్చు ....దెయ్యం కావచ్చు ....

సమాజంలో ...ఎవరి నమ్మకాలు వారివి ....ఎదుటివాళ్ళ మెదళ్ళమీద దానిని పెట్టనంతవరకు ...ఏ ఇబ్బందీ లేదు ....

కాదూ కూడదు అంటే ....

వారితో స్నేహం కొనసాగించడం అనేది ....ఇబ్బంది కలిగిస్తుంది ....

నాకో /నీకో ...ఏవో కొన్ని అలవాట్లు ఉండొచ్చు ....ఏ ఇద్దరి అలవాట్లు ఒకే విధంగా ఉండవు ...

నా అలవాటే గొప్పది ...ఇక ప్రపంచంలో మిగతావన్నీ భ్రస్టు పట్టిపోయాయి అంటే ....ఎలా ...

నీ అలవాటు నీ జీవితానికి అనుకూలంగా ఉంటుంది ....నా అలవాటు నా జీవితానికి అనుకూలంగా ఉంటుంది ....

కాదు ...నేను నమ్మిన ఆచరిస్తున్న అలవాటే అందరూ అలవరచుకోవాలి అనేవాళ్ళతో స్నేహం , బంధం ఏదీ కొనసాగదు...

ఇవన్నీ ఎవరివి వారు సొంతం చేసుకుని ....ఆచరిస్తూ ....ఉన్నంతకాలం ....ఆమోదించదగ్గవే ...మనకు ఇబ్బంది కలిగించనివే ....

లేకపోతే...వాళ్ళని భరించడం కష్టం ...!

అలా ఉంటారండీ కొందరు మెగా మహారాజులు ..

 "కాస్త కూరలో ఉప్పు చూడండి..." చేపల పులుసులో ఉప్పు , కారం సరిపోయిందేమో చూస్తారని పిలిచా మా వారిని ...(నాకు ఉప్పు చూసే అలవాటు లేదు ...అందుకే ఎవరో ఒకరిని పిలుస్తూ ఉంటా ...)

కూరలో ఉప్పు చూసి ... "కాస్త కారం తగ్గింది ..." చెప్పారు ...

ఒక స్పూన్ కారం తగిలించా ...

"కాస్త ఉప్పు కూడా తగ్గినట్టు ఉంది ..."మళ్ళీ చెప్పారు ...

పులుసులో కాస్త ఉప్పు ఎక్కువే పడుతుంది ...అందునా పచ్చి మామిడికాయ తగిలించా కాబట్టి ....మరో స్పూన్ ఉప్పు కూడా వేశా ...

"ఓహ్ ..టేస్ట్ అదిరిపోయింది ...."చెప్పారు చివరగా ...

చిన్నతనంలో ...పిల్లలందరం ఒక పాట పాడుకునే వాళ్ళం ....

"పిల్లల్లారా పిల్లల్లారా పిండి కొట్టండి ...

పార్వతీ దేవొచ్చి పాకం పట్టిద్ది..

అలివేలు మంగమ్మొచ్చి అరిసెలొండిద్ది ...(అరిసెలు వండుతుంది )

ఎంకటేసుల్ సామొచ్చి (వెంకటేశ్వర స్వామి ) ఎంగిలి చేసి పోతాడు "

"మేం పిండి కొట్టి , పాకం పట్టి , అరిసెలు చేసాం ...ఇక మీరు ఆరగించొచ్చు ...మహా మహా దేవుళ్ళే పని చేయకుండా హాయిగా ఆరగించి బతికేశారు ..." చెప్పా ...కొత్తిమీర కట్ చేసి ...చల్లేసి ..స్టవ్ కట్టేసి ...

"నేను హెల్ప్ చేయలేదు కాబట్టి ...నాకు ఇది తినే రైట్ లేదు ...తినొద్దు ...అని ఒక్క మాట చెప్పు ....ప్లీజ్ " అడిగారు ...

"చెప్పను ...పుట్టుకతో, పెంపకంతో ...ఒక రకమైన సంస్కారం వచ్చి సచ్చింది ...నేను చెప్పాలన్నా ....అది నన్ను చెప్పనివ్వదు ..." నవ్వి చెప్పా ...

ఇంతకూ ...ఎందుకు అలా తినొద్దు అనమని అడిగారో చెప్పలేదు కదూ ...

అంతకు ముందే ఏదో ఆహారం పొట్టనిండా లాగించారు ....ఖాళీలేదు ...అందుకే ...నేనలా అంటే అయినా తినకుండా ఉండొచ్చని ఆశ ...

ఏం పర్లేదు ...ఖాళీ అయ్యాక ...నేనొకదాన్ని ఇంట్లో ఉన్నానని కూడా గుర్తు లేకుండా లాగించేస్తారు ...

అలా ఉంటారండీ కొందరు మెగా (వివాదాస్పదమైన పదాలు వాడకూడదని ...మెగా అని వ్రాశా )మహారాజులు ...!

లేదా మరుజన్మ కైనా తిరిగి చెల్లించాల్సి రావచ్చు

 ఎవరైనా నిన్ను దూషిస్తే, ద్వేషిస్తే, అవమానిస్తే, వేరు చేసి మాట్లాడితే ...వాళ్ళే నీ ఆత్మీయులు అని అర్ధం ..వాళ్ళు నిన్ను ఈ భవబంధాల నుండి విముక్తి చేయడానికి సహాయపడుతున్నవారు ...వారికి మనం చేతులెత్తి మొక్కాలి ...!

ఎవరైనా నిన్ను ప్రేమిస్తే , ఆరాధిస్తే , గౌరవిస్తే, వారిలో ఒకరిగా కలుపుకుంటే ...వాళ్ళు నిన్ను రుణ గ్రస్తుల్ని చేస్తున్నవారు ...వాళ్ళ ఋణం తీర్చుకోవడానికి నువ్వు అనుక్షణం వారికి బందీగానే ఉండాలి ...మనల్ని మనం తప్పనిసరిగా రుణవిముక్తుల్ని చేసుకోవాలి ..!

లేదా మరుజన్మ కైనా తిరిగి చెల్లించాల్సి రావచ్చు ..!

దుఃఖం - సంతోషం

 దుఃఖం - సంతోషం

============

నాకు దుఃఖం కలిగినప్పుడు ..నా చుట్టూ ఉన్న ప్రపంచం అంతా సంతోషంగా ఉంది అనుకోవడం ఆత్మన్యూనతా భావం ..

నాకు సంతోషం కలిగినప్పుడు ..నా చుట్టూ ఉన్న ప్రపంచం అంతా దుఃఖం లో ఉంది అనుకోవడం అహంకార భావం ..!

నాకు దుఃఖం కలిగినప్పుడు ..నేను ఒక్కదాన్నే ఏడుస్తూ ఉన్నాను అనుకోవడం అమాయకత్వం ..

నాకు సంతోషం కలిగినప్పుడు ..నేను ఒక్కదాన్నే సంతోషంగా ఉన్నాను అనుకోవడం అవివేకం ..!

శ్యామ్ సింగ రాయ్...

 శ్యామ్ సింగ రాయ్...

ఈ సినిమా టికెట్స్ బుక్ చేసాక ...లాస్ట్ మూమెంట్ లో ఆ రెండు గంటలు ధియేటర్ కి వెళ్లి ఏం చూస్తాంలే క్యాన్సిల్ చేసేద్దామా అనుకున్నా ...సినిమా టైం లో ఒక గంట ముందు వరకు క్యాన్సిల్ చేయడానికి అవకాశం ఉంటుంది ...

కానీ నా డాటర్ కూడా వస్తాను అంది సినిమాకి ....సరేలే పిల్లలను డిసప్పోయింట్ చేయడం ఎందుకు నా కోసం అని ....సినిమాకి వెళ్ళా ...

కానీ వెళ్ళాక అనిపించింది ....మంచి పని చేశాను ....క్యాన్సిల్ చేయకుండా అని ...

కొన్ని సినిమాలు బాగుంటాయి ....అందరికీ నచ్చుతాయి ....కానీ సినిమా చూసినంత సేపు ...లాజిక్ మిస్సవుతుంది ....అన్ని ప్రశ్నలే ....

కానీ కొన్ని సినిమాలు చూసినంత సేపు ....లాజిక్ అనే పదం ఒకటి ఉందని గుర్తే రాదు ...

ఇది నిజమా కాదా అనే ధ్యాసే ఉండదు ...

అది నిజమే అని నమ్మాలనిపిస్తుంది ...అదే నిజం అని నమ్మించాలనిపిస్తుంది ....నిజం కాదన్న వాళ్ళని నిజంగా ఒకటిచ్చుకోవాలనిపిస్తుంది ...

అందుకే పునర్జన్మ నిజమా కదా ....అనే ఆలోచన పక్కన పెట్టి ...కాసేపు నిజమని నమ్మేసి ...సినిమా చూసేస్తే ....సినిమా అద్భుతం ...అని చెప్పొచ్చు ...

నాకైతే సినిమా చాలా నచ్చింది ...

మనం మన తరవాత తరాలకు .....మన సంస్కృతి ...మన సంప్రదాయాలు ...మన చారిత్రక సంపద ....ఇవన్నీ ఇవ్వాలని కోరుకుంటాం .....

కానీ ఇవన్నీ మనకే తప్పుల తడకలుగా కనిపిస్తే ....వాటిల్లో తప్పులన్నీ పెంచి పోషిస్తూ ఉంటే...వాటిల్లో ఉన్న మూఢత్వాలను స్వార్ధ ప్రయోజనాల కోసం సమర్ధించుకుంటూ పోతే ...ఒక దశలో ...మన సంస్కృతికి ....మన సంప్రదాయాలకు మనమే దూరంగా బ్రతుకుదాం అనిపించేంత అసహ్యం వేస్తుంటే ....తరవాత తరాలకు మనమేం ఇస్తాం ....?!

అదే ....పరిస్థితులకు బానిసలై ఏర్పడిన దురాచారాలను ....పరిస్థితులు మెరుగుపడ్డప్పుడైనా నిర్మూలించుకుంటూ పోతే ....ఒక స్వచ్ఛమైన ...ఆదర్శవంతమైన సంప్రదాయాలను భావి తరాలకు పరిచయం చేసిన వాళ్ళమవుతాం ...

ఇప్పుడు నేను వ్రాసిన దానికి సినిమాకి ఏం సంబంధం లేదు ....

సినిమా చూశాక కలిగే ఆలోచనలు మాత్రమే వ్రాశాను ....

సినిమా వీటన్నిటికి అతీతం ....సినిమాని ఒక అద్భుత కావ్యంగా మలిచాడు దర్శకుడు ....మాటల, పాటల, కథా రచయితలూ దానికి ప్రాణం పోశారు ....

ఇక నటీ నటులైతే చెప్పాల్సిన అవసరం లేదు ....నట వర్గం కనిపించలేదు ....

పాత్రలు మాత్రమే కనిపించాయి ....

సినిమా తప్పక చూడండి...

కుదిరితే... నేను నా డాటర్ వచ్చాక (ఇప్పుడు హవాయి ట్రిప్ లో ఉంది )....అప్పటికి ఈ సినిమా ధియేటర్ లో ఉంటే ....టికెట్స్ బుక్ చేసి మరీ సినిమాకి పంపిస్తాను ....

అసలే మా ఇంట్లో నాని / సాయిపల్లవి ఫాన్స్ ఎక్కువ ...!

అన్ని ఒకటో రెండో ....నేను మైంటైన్ చేయగలిగినన్ని ఉండాలి ....

 ఇవ్వాళ నా జీన్ ప్యాంటు చిరిగిపోయింది ...

కానీ ఆ చిరిగిపోయిన ప్యాంటు తోనే ...మధ్యాహ్న్నము వరకు ఉండాల్సి వచ్చింది ...

ఎలాగో ఎవరూ చూడకుండా నడిచి ...కవర్ చేసుకున్నా అనుకోండి ...

ఆఫ్కోర్స్ ఎవరైనా చూసినా ఇంక చేసేదేం ఉంది ...లైట్ లే అనుకున్నా ...

అయితే ...అసలు అది చిరిగిపోయిందాకా ఉండాల్సిన అవసరం ఏమొచ్చింది అనేది శ్రేయోభిలాషుల ప్రశ్న ...

దానికి నా దగ్గర సమాధానం లేదు ....

అప్పుడు....చిరిగిన ప్యాంటు సాక్షిగా మరోసారి నా మనస్తత్వాన్ని పునః సమీక్షించుకున్నా ....

మొన్న థాంక్స్ గివింగ్ టైం లో ....పిల్లలు ...."మమ్మి నీకు కూడా కొన్ని షర్ట్స్ ఆర్డర్ చేయమంటావా ...మంచి ఆఫర్స్ ఉన్నాయి ..." అడిగారు ....

"చూద్దాం లేరా ....అయినా అవసరం అయినంతవరకు ఉన్నాయిగా ....అవి పాడై పోయాక చూద్దాంలే ..." చెప్పా ....

అయినా ఊరుకోక ఓ రెండు మూడు ఆర్డర్ చేసారు ...

వేసుకుని చూడడం ....వాళ్లేమో ...ఏ యాభై / వంద డాలర్లో చెప్పడం ....ఇప్పుడు ఎందుకులేరా ....ఆఫర్స్ ఎప్పుడూ ఇస్తూనే ఉంటారు ...తర్వాత తీసుకుంటాలే ...రిటర్న్ చెయ్యండి అనడం ....

తర్వాత మరో రోజు నా డాటర్ ఒక ప్యాంటు ఆర్డర్ చేసుకోవడం ....అది మరీ కళ్ళు చెదిరే రేంజ్ లో ఉండడం ....ఎంతరా అని అడగడం ....200 డాలర్లు అని చెప్పడం ....నీకు కూడా ఒకటి కావాలా అని నన్ను అడగడం ...వామ్మో ...నాకొద్దురో అని నేను అనడం ...తర్వాత కొన్ని ఫ్రాక్స్ బాగున్నాయని నాకు చూపించడం ....అవి కావాలా అని అడగడం ....ఇప్పుడొద్దులేరా అనడం ....

ఈ తరహా సమాధానాలతో పిల్లలు విసిగిపోయి ...చివరకు నన్ను అడగడం మానేసి ....వాళ్ళే వాళ్ళకోసం ఏవో ఆర్డర్ చేసుకుని సంబరపడ్డారు ....

మరో సందర్భంలో నా డాటర్ ....మమ్మి నీ దగ్గర ఎక్స్ట్రా హ్యాండ్ బాగ్ ఉందా అని అడగడం ....

నాకున్న ఒక్క హ్యాండ్ బాగ్ చూపించి ....అదొక్కటే ఉందిరా నా దగ్గర అనడం ....

ఇంకో సందర్భంలో మ్యాచింగ్ చెప్పులు కోసం చూడడం ....నాకున్న రెండు జతల చెప్పులు తిప్పి తిప్పి వేసుకోవడం ....

ఇలా ...షూస్ ఒక జత ....చెప్పులు ఒక జత ...కూలింగ్ గ్లాస్సెస్ ఒకటి ....ఫేస్ క్రీం ఒకటి ....వాచ్ ఒకటి ....పర్స్ ఒకటి ...

నాకు అన్ని ఒకటో రెండో ....నేను మైంటైన్ చేయగలిగినన్ని ఉండాలి ....

అంతకంటే ఎక్కువ నేను కొనను ....కొనడం ఇష్టం ఉండదు ....

షాప్ కి వెళ్ళినప్పుడు ఏవో కొత్త మోడల్స్ ఉంటాయి ....అవి బాగా నచ్చుతాయి ....కానీ వెంటనే ...అయ్యో ఇంట్లో ఒకటి ఉందిగా ...అది పాడైపోయాక కొనుక్కోవచ్చులే అనుకుంటా ...

అలాగే జీన్స్ కూడా నాకు రెండే ఉన్నాయి ....అవి పాడైపోయాక కొనుక్కోవచ్చులే అనే ఆలోచన ...

ఇవ్వాళ దానికి రోజులు చెల్లిపోయాయి ...

నాకెందుకో ఎక్కువ ఉంటే ....వాటిని మైంటైన్ చేయలేక ...అవి నాకు బరువుగా అనిపిస్తాయి ...

అభద్రతా భావం కలుగుతుంది ...

బహుశా కొంతమందికి ఎక్కువ లేకపోతే అభద్రతా భావం ఉండొచ్చు ...కాదనలేను....

ఎవరిష్టం వాళ్ళది ...

నా జీవితం ఎలా ఉండాలని నేను కలలు కంటానంటే ....నా నిత్యావసర వస్తువులు ఒక సూట్ కేస్ లో పట్టే విధంగా ఉంచుకుని ....ఎప్పుడైనా ...ఎక్కడికైనా వెళ్లిపోగలగాలి ....

మరి ఇదంతా వ్రాసుకున్నా కదా ....ఏమైనా మార్పొస్తుందా అంటే ....

మారాల్సిన అవసరం ఇప్పటివరకు కనిపించలేదు ....నా మనస్తత్వం అందరిలా ఉండాలని ఏం లేదుగా ...ఊరికే రివ్యూ కోసం వ్రాసుకున్నా ...నేనింతే ...

అయితే ఈ మధ్య కొన్ని చీరలు మాత్రం కొన్నా ....కొన్నప్పుడు సంతోషంగానే అనిపించింది కానీ ...తర్వాత అంత బాగా అనిపించలేదు ....అనవసరంగా అవసరం లేకుండా కొన్నానే అని బాధపడ్డా ...

నా దగ్గర అవసరానికి మించి ఏదైనా ఉన్నాయి అంటే ...అవి చీరలు మాత్రమే ...

నా మనస్తత్వం ఎందుకిలా ఉంది అనేది ...నేనే రీసెర్చ్ చేసుకోవాలి..

ఎప్పుడో చిన్నతనంలో స్కూల్ లో ఆటలాడుతూ స్కర్ట్ చిరిగిపోతే ....కనపడకుండా దాచుకుంటూ ఇంటికొచ్చిన గుర్తు ....

ఇదిగో మళ్ళీ ఇన్నాళ్లకు ఇలా ....

ఇప్పుడు అర్జెంటుగా ఒక జీను ప్యాంటు కొనుక్కోవాలి ....అప్పటివరకు ...ఒకటే ప్యాంటు మరి ...!

మా అయన వంట చేయాలి అని అందుకే నేను కోరుకోను ....

 మొన్నొక రోజు ..."మిరియాల చారు పెట్టమంటావా " అడిగారు మావారు ....

అంటే ....ఈ మధ్య నా డాటర్, వాళ్ళ డాడీ కి ట్రైనింగ్ ఇచ్చి మరీ కొన్ని వంటలు నేర్పిస్తుంది ...

అంటే కొన్ని అయినా నేర్పిస్తే మమ్మి కి హెల్త్ బాగాలేనప్పుడు వండి పెడతారని తన ఆశ ...(అది నాకు అర్ధం అయింది )

"చూసావా ...తను ఎంత బాగా నేర్పిస్తుందో ...నువ్వెప్పుడైనా ఇలా నేర్పించావా ...." అన్నారు నా వైపు చూస్తూ ...

"ఆ శభాష్ శభాష్ ...బాగా నేర్చుకోండి ...నేను ఎప్పటికీ మీకు ఇలా నేర్పించలేను ....నేను ఏదైనా చెబితే తమరు చెవిదాకా రానిచ్చింది ఎప్పుడు ...." చెప్పా ...ప్రశాంతంగా ...

ట్రైనింగ్ లో భాగంగా ....ఈ మిరియాల చారు పెట్టడం నేర్చుకున్నారు ....ఈ మధ్య ...

నాకు అప్పుడే ఆరోగ్యం బాగోలేక ...నా పాటికి నేను పడుకుని ఉంటే ....అప్పుడు మిరియాల చారు అఫర్ వచ్చింది ...

ఉఊ అనే ఓపిక లేక ...ఊ అని మూలిగా ...

ఇంకేముంది ....చారు కార్యక్రమం షురూ అయ్యింది ....

ఆ తాలింపులో ఏం వేస్తారో ఏమో గానీ ....బాత్ రూమ్ లో కి వెళ్లి దాక్కున్నా ...కోరు తప్పించుకోలేను ...

నాకు ఆ తాలింపు కోరు అస్సలు పడదు ....

అయినా ఏదో కాసేపులే ...అని ముక్కు మూసుకుని భరించేసి ...ఎలాగో ఆ చారు పెట్టాక ....కాస్త నాలుగు మెతుకులు ఎంగిలి పడ్డా ...

"ఇంకాస్త చారు పోసి ఇవ్వనా ...."అడిగారు ....

జలుబు చేసిన గొంతుకి కాస్త హాయిగా అనిపించిందేమో ....కాసిన్ని ఇవ్వండి ....అని అడిగా ....

దానికి ..."డాడీ మీరు చేసిన వంట మమ్మి రెండోసారి అడిగి మరీ తాగుతుంది ...గుడ్ జాబ్ డాడీ" అనడం ....

నాకు రసం పెట్టడం వచ్చేసిందోచ్ అని ....ఈయన గంతులు వేయడం ఎలాగో అయిపొయింది ....

రెండో రోజు ....స్టవ్ దగ్గరికి పోదును కదా ....

ఆ రసం పెట్టడం ఏమో గానీ ....స్టవ్ మాడబెట్టిన వైనానికి అది క్లీన్ చేసేసరికి ...నా చేతులు అరిగి పోయి ....తాతలు దిగొచ్చారు ....

వంట చేయడం అంటే ...ఎవరో ఒకరు నేర్పిస్తారు ...

క్లీన్ చేయడం ఎవరు నేర్పిస్తారు ....

చిన్న బేసిక్ థింగ్ ...మన చుట్టూ ఉన్న పరిసరాలు మనం శుభ్రం చేసుకోవాలి ...

మనం తిన్న కంచాలు మనం కడుక్కోవాలి ...

వంట చేసాక ...పొయ్యి కడుక్కోవాలి అనేది ...

అది ఎప్పటికి నేర్చుకుంటారో ....

ముఖ్యంగా మగాళ్లు ....అదీ మా అయన వంట చేయాలి అని అందుకే నేను కోరుకోను ....

చేస్తాను అంటే ....భయం వేసేది కూడా అందుకే ....

పస్తు అయినా పడుకోవడానికి రెడీ కానీ ....తరువాత చేసుకునే క్లీనింగ్ తలచుకుని వణుకు పుడుతుంది ....

వంట చేయడానికి నాకు అరగంట పడితే ... ఆయనతో వంట చేయించుకుని అది క్లీన్ చేసుకోవడానికి రెండు గంటలు పడుతుంది ....

కాబట్టి నాకు, వంట చేసుకోవడమే బెటర్ ఆప్షన్ ....

అందుకే ..., పులిబొంగరాలు నేను చేశాను ....పుదీనా చట్నీ నా డాటర్ చేసింది ...

ఇద్దరం హాయిగా తినేశాం ..!