Sunday, May 28, 2017

ఇతరుల కష్టాలు కొందరికి డ్రగ్స్ లాంటివి ....

ఇతరుల కష్టాలు కొందరికి డ్రగ్స్ లాంటివి ....అలాంటి డ్రగ్స్ తీసుకునే
ప్రమాదకరమైన వ్యక్తులకు .....మనం దూరంగా ఉండాలి .....
కొందరు ఏం చేస్తారంటే .....మన కష్టాలు విని మనకు సానుభూతి చూపిస్తున్నట్టు నటిస్తూ ....ఆ కష్టాన్ని ఇంకా ఇంకా మనం చెప్పేలాగా ప్రశ్నిస్తూ ఉంటారు .....
మనం వాళ్ళు సానుభూతి చూపిస్తున్నారు కదా అనుకుని ఇంకా లోతుగా విషయాన్ని చర్చిస్తాం ....అసలు అలా మనం చెప్పేస్తున్నాం అని మనకు తెలియకుండానే మనం చెప్పేస్తాం కొన్నిసార్లు .....వాళ్ళ ప్రశ్నలు కూడా అలాగే ఉంటాయి ......
ఉదాహరణకు ...మనం విపరీతమైన కష్టం వచ్చి బాధపడుతున్నాం అనుకోండి ....ఒకసారి మనపై సానుభూతి చూపిస్తారు ....అప్పుడు మనము చాలా బాధలో ఉన్నాం కనుక ....వాళ్ళు చాలా ఆత్మీయులుగా కనిపిస్తారు .....మనం కూడా వాళ్ళ సానుభూతిని స్వీకరించి ....ఆసరాగా చేసుకుని త్వరగా కోలుకోవాలని ప్రయత్నిస్తాం .....
మళ్ళీ ఓ వారం పోయాక వస్తారు .....సహజంగానే అప్పటికి కాస్త జన జీవన స్రవంతిలో పడిపోతాం మనం ....కానీ ఆ బాధ తాలూకు గాయం , వాళ్ళ ఓదార్పు తాలూకు కృతజ్ఞత ఇంకా మిగిలే ఉంటాయి ....వాళ్ళు మళ్ళీ ఇదివరకు లాగే సానుభూతి ప్రదర్శిస్తారు .....
ఆ కష్టం ఎలా వచ్చింది ....ఎందుకు వచ్చింది ....వచ్చినప్పుడు మనం ఎంత బాధపడ్డాం ......మనం అప్పుడు ఎంత హృదయవిదారకంగా ఏడ్చాము ....తదితర విషయాలు .....గంటల తరబడి నింపాదిగా పదే పదే చర్చిస్తూ కూర్చుంటారు .....మనం కూడా వాళ్ళతో ఆ కష్టం గురించి షేర్ చేసుకుంటాం ....
మళ్ళీ కొన్నాళ్ల తర్వాత ....మనం బాధ తాలూకు గాయం బాధపెడుతున్నా .....బాధ్యతను గుర్తెరిగి దాన్ని మర్చిపోవాలని ప్రయత్నిస్తూ ఉంటాం ....అయితే ఇదివరకు ఉన్నంత బాధ మనలో ఉండదు .....
వాళ్ళు మళ్ళీ వచ్చి అదే రకమైన పరామర్శలు మొదలు పెడతారు ....వాళ్ళు వచ్చారు కాబట్టి ....మనం ఎక్కువ బాధపడానికి ప్రయత్నిస్తాం .....మనకు తెలియకుండానే ....
కానీ మేం సాధారణ స్థితికి వచ్చాము ....మీరు కూడా మర్చిపోండి అని వాళ్లకు పరోక్షంగా తెలియజేయాలని ప్రయత్నిస్తాం .....అయినా వాళ్ళొచ్చిన పని వాళ్ళు కానిస్తారు .....
కాబట్టి అలాంటి వాళ్లకు సాధ్యమైనంత దూరంగా ఉండడం ఎలాగో గుర్తించకపోతే ....మనం కూడా ఆ డ్రగ్ కి అలవాటు పడే ప్రమాదం ఉంది ....😥

బాధ్యత , ప్రేమ , అభిమానం, జీవితం లాంటివి నాలో నింపుకుని

ఉదయం నిద్ర లేవగానే నా వైపు కొన్ని భావాలు ప్రయాణించి నా చెంతకు చేరతాయి .....😍
వాటిలో ....బాధ్యత , ప్రేమ , ద్వేషం , అభిమానం , అసూయ , జీవితం , మరణం .....ఇలా ఎన్నో భావాలూ , అనుభవాలూ ......
అయితే నేను ఆ రోజుకు వాటిలో ఏం స్వీకరించి ముందుకు నడుస్తాను అనేది నా ఇష్టాయిష్టాలపై ఆధారపడి ఉంటుంది ....

నేను .... , బాధ్యత , ప్రేమ , అభిమానం, జీవితం లాంటివి నాలో నింపుకుని ముందుకు నడుస్తూ ఉంటా ....నాకెదురైన వాళ్లకు అవే పంచాలని ప్రయత్నిస్తూ ఉంటా ......
అయితే... కొందరు ...., ద్వేషం , అసూయ , మరణం స్వీకరించిన వాళ్ళు నాకు ఎదురవుతూ ఉంటారు ....వాళ్లకు ప్రేమ లాంటివి స్వీకరించడం రాక ....చేతకాక అయి ఉంటుంది అనుకోండి ....😜
వాళ్ళు వాళ్ళ దారిలో వచ్చినవాళ్ళకు అవే ఇవ్వాలని చూస్తూ ఉంటారు ....😥
అలాంటి వాళ్ళకు కూడా నా దగ్గర ఉన్నవి ఇచ్చి పంపించాలని ప్రయత్నిస్తూ ఉంటా .....😍
వాళ్ళు స్వీకరించనివ్వండి  ...లేకపోనివ్వండి ....నా దగ్గర ఉన్నదే ఇవ్వగలను కానీ ....లేనిది ఎలా ఇవ్వగలను చెప్పండి ....??!!🤔🤔

ఇంట గెలిచి రచ్చ గెలవాలి

సామాజిక పరంగా , కుటుంబపరంగా , వ్యక్తిగతంగా ......మనం నివసించే పరిసరాలను రెండు భాగాలుగా విభజించుకోవచ్చు .....ఒకరు బయట ప్రపంచం అయితే , మరొకరు కుటుంబ సభ్యులు .....
మనం కుటుంబ సభ్యులతో ఉన్నంత చనువుగా బయట వాళ్ళతో ఉండలేం .....అలాగే బయట వాళ్ళతో ఉన్నంత దూరంగా కుటుంబ సభ్యులతో ఉండలేం .....
కొన్ని పరిస్థితుల్లో దీనికి వ్యతిరేకంగా కూడా కొందరు చేస్తూ ఉంటారు .....వారి గురించి మనం వేరే మానసిక కారణాలు చెప్పుకున్నప్పుడు చర్చించుకుందాం .....
-----------------------------
కొందరు .....బయటవాళ్ళతో చాలా చనువుగా ఉండి .....అసలు వాళ్ళే కుటుంబం అన్నట్టు ఉండి .....ఇంటికి రాగానే అద్దె ఇంటికి వచ్చిపోయినట్టు ప్రవర్తిస్తారు .....ఇంట్లో ఏవైనా ఉన్నాయా లేవా అని వీళ్లకు పట్టదు ....ఎదో తినడానికి ముష్టి వాళ్లకు వేసినట్టు తిండికి సరిపడా డబ్బులిస్తున్నాం కదా అంటారు .....
బస్టాండ్ లో కూర్చుని అరటి పళ్ళు తిని అరటి తొక్కలు విసిరి పడేసినట్టు, కిళ్ళీ వేసుకుని బస్సు మీద సగం , నడిచే దారిలో సగం పడేలా ఉమ్మేసినట్టు ,
జేబులో ఉన్న కాగితాలన్నీ సర్దుకుని అందులో పనికి రాని కాగితాలు ఉండచుట్టి విసిరేసినట్టు ,
సిగరెట్ తాగి ....పొగను పక్కన ఉన్న వాళ్ళ మొహం మీద ఊది....చివరన మిగిలిన ముక్కను ఆర్పడానికి కూడా బద్ధకం వేసి చిన్న పిల్లలు నడిచి వస్తున్న దారిలో పడేలా విసిరేసినట్టు .....
బాత్ రూమ్ కి వెళ్లి నీళ్లు పోయకుండా ..అక్కడ ఉన్నవాళ్ళతో శుభ్రంగా లేవు అని గొడవ పెట్టుకుని డబ్బులు ఇవ్వకుండా వచ్చినట్టు ....
వీళ్లకు ఇల్లంటే పబ్లిక్ బస్టాండ్ ......
మళ్ళీ బయట వాళ్ళ దగ్గరకు పోగానే ...అదే తమ సొంత కుటుంబం అయినట్టు ప్రవర్తిస్తారు....
నాకు ఇలాంటి కుటుంబం ఉంటే బాగుండేది ....నన్ను మా వాళ్ళు రాచి రంపాన పెడుతున్నారు .....నన్ను వాళ్ళు ప్రేమించడం లేదు .....ఇంటికి పోతే నరకంలా ఉంది .....అని అందరి దగ్గరా ప్రేమను అర్థిస్తూ బ్రతుకుతారు .....
పోయిన దగ్గరనుండి ....ఇంట్లో వాళ్ళను ఎదుటివాళ్ళ దగ్గర తిడుతూ బ్రతికేస్తారు ....
ఇక మరి కొందరు ....బయట వాళ్ళ దగ్గర ఎంత వరకు ఉండాలో అంతవరకు ఉండి....ఇంటికి రాగానే అదే తమ ప్రపంచంలా బ్రతికేస్తారు .....
మరి కొందరు .....ఇంట్లోనూ బయట ....ఎవరికీ పనికి రాకుండా బ్రతికేస్తారు .....
-------------------------------
ఏది ఏమైనా .....ఇంట గెలిచి రచ్చ గెలవాలి అని మన పెద్దవాళ్ళు చెప్పినట్టు .....
ఇంట్లో ఉన్నవాళ్ళ ప్రేమను , అభిమానాన్ని పొందలేకపోయినవాళ్ళు ....ప్రపంచాన్ని ఉద్దరించడానికి బయలుదేరితే .....ప్రపంచం మొహంమీద ఛీ కొడుతుంది అనేది మర్చిపోకూడదు ..... !!

బ్రతుకంటే భయపెట్టడం తప్ప .....బ్రతుకే లేకుండా చేయలేవు .....!

కొంతమంది మనకు సంతోషం కలిగినప్పుడు మనకు దగ్గరవుతారు .....
వాళ్ళ ఉద్దేశ్యం, మన సంతోషం పంచుకోవడం కావచ్చు ....లేదా వాళ్ళ దుఃఖం తగ్గించుకోవడం కావచ్చు ...
కొందరు మనకు దుఃఖం కలిగినప్పుడు దగ్గరవుతారు ...
వాళ్ళ ఉద్దేశ్యం మన దుఃఖం పంచుకోవడం కావచ్చు ...లేదా వాళ్ళ సంతోషం తగ్గించుకోవడం కావచ్చు ......
ఏది ఏమైనా .....
మన దుఃఖం పంచుకోవడానికి ఎవరైనా ముందుకు వస్తే ....వాళ్ళు ధైర్యవంతులని అర్ధం .....వాళ్లకు వాళ్ళ దుఃఖాన్నే కాదు ....ఎదుటివాళ్ళ దుఃఖాన్ని కూడా భరించగలిగే గుండె ధైర్యం ఉందని అర్ధం .....అదే దుఃఖాన్ని ఎక్కడ పంచుకోవలసి వస్తుందో అని ఆ సమయంలో పారిపోతే ....వాళ్లంత పిరికివాళ్ళు ఈ ప్రపంచంలో లేరని అర్ధం .....వాళ్ళ దుఃఖం కూడా ఎదుటి వాళ్ళ మీద తోసే ప్రమాదకారులని అర్ధం ...వాళ్లకు సాధ్యమైనంత దూరంగా ఉండాలని అర్ధం ....
మన సంతోషం పంచుకోవడానికి ఎవరైనా ముందుకు వస్తే ....మనం ధైర్యవంతులం అని అర్ధం ....మన దుఃఖాన్ని మనం భరించడమే కాదు .... మన సంతోషాన్ని ఎదుటివాళ్ళకు పంచే ...గుండె ధైర్యం మనకుందని అర్ధం ....
ఏది ఏమైనా నేను గమనించినదాన్ని బట్టి.... ఎక్కువ శాతం మంది మనుషులు ఎప్పుడూ మనం సంతోషంగా ఉన్నంత కాలం మన చుట్టూ ఉంటారు ....మనం దుఃఖంలో ఉంటే మన నుండి దూరం జరుగుతారు .....
మన విజయాల్లో మనల్ని అంటిపెట్టుకుని ఉంటారు .....మన అపజయాల్లో మనల్ని ఎడారుల్లో వదిలేసి పోతారు .....
అన్ని మన దగ్గర ఉంటే మనల్ని ప్రేమిస్తారు .....ఏమీ లేకుంటే మనల్ని ద్వేషిస్తారు .....
అందుకే మనం నేర్చుకోవాల్సింది ఏమిటంటే ....
అపజయాల్లో ఉన్నప్పుడు, దుఃఖంలో ఉన్నప్పుడు, మన దగ్గర ఏమీ లేనప్పుడు... మనల్ని మనం ఎలా ప్రేమించుకోవాలి .....మనలో మనం సంతోషం ఎలా సృష్టించుకోవాలి .....మన జీవితం మనం ఎలా జీవించాలి ....అని .....
అది నేర్చుకుంటే మిగతావన్నీ అప్పుడప్పుడు వచ్చే పిల్ల తుఫానుల్లాంటివి .....
బ్రతుకంటే భయపెట్టడం తప్ప .....బ్రతుకే లేకుండా చేయలేవు .....!

Saturday, May 27, 2017

జగమంతా ప్రేమ మయమే కదా ...

మనకు కొందరిని చూస్తే భయం వేస్తుంది ....
కొందరిని చూస్తే సిగ్గేస్తుంది (ఒక్కరినే కూడా కావచ్చు )...
మరి కొందరిని చూస్తే ప్రేమ కలుగుతుంది (ఇది కొందరికి, ఒక్కరే కాకపోవచ్చు)
కొందరిని చూస్తే ఇష్టం కలుగుతుంది .....(ఇది ప్రతి జీవీ కావచ్చు)
నిజానికి ....ఆలోచిస్తే.... మనుషులంతా ఒక్కటే ....మనం వాళ్ళ ముందుకు వెళ్ళనంత వరకు, లేదా వాళ్ళు మనకు ఎదురు కానంతవరకు ....
కానీ ఒకరికొకరు ఎదురయ్యాక ఏం జరుగుతుంది అని ఆలోచిస్తే ...,,,
ప్రతి మనిషి ఒక అద్దం లాంటి వ్యక్తి మరో వ్యక్తికి ....ఎదురు కాగానే మన ప్రతిబింబం మనకు ఎదుటివాళ్ళలో కనిపిస్తుంది ....
ఆ ప్రతిబింబం మనం మనల్ని వాళ్ళల్లో ఎలా చూస్తున్నామో అలా కనిపిస్తుంది ....
అంటే మనల్ని చూసుకోవడానికి మనం భయపడుతున్నాం అంటే ... ,,,
ఎదుటి వాళ్ళు నిజం అనే అద్దాన్ని కలిగి ఉండి మన ప్రతిబింబం అబద్ధం కావచ్చు ....లేదా మనం నిజం అనే ప్రతిబింబాన్ని కలిగి ఉండి ఎదుటివాళ్ళు అబద్ధం అనే అద్దం కావచ్చు .....
మనల్ని మనం చూసుకోవడానికి సిగ్గేస్తుంది అంటే .....,,
ఎదుటివాళ్ళు నగ్నత్వం అనే అద్దాన్ని కలిగి ఉండి .. మన ప్రతిబింబం మనకు నగ్నంగా కనిపించొచ్చు ....లేదా మనల్ని మనం నగ్నంగా చూపించే అవసరం ఎదుటివాళ్ళ అద్దం ముందు మనకు అవసరం కావచ్చు ....(ఇక్కడ నగ్నత్వం అంటే ....భావ నగ్నత్వం అని పాఠకులు అర్ధం చేసుకోవాలని మనవి )
ప్రేమ ,ఇష్టం కూడా మన ఇష్టం మన ప్రేమ ని మనం చూసుకుంటున్నాం అని అర్ధం ....
ఇక ద్వేషం , పగ , ప్రతీకారం కూడా అలాంటివే ....
ఏది ఏమైనా ....ప్రతి మనిషి లో మనం చూసేది మన ప్రతిబింబాన్నే అని గుర్తు పెట్టుకుంటే ....
ప్రతి మనిషిలో మనలో ఉన్న ప్రేమనే చూసుకోవడం మనం అలవాటు చేసుకుంటే జగమంతా ప్రేమ మయమే కదా .... <3 <3 <3

అలాంటివాళ్ళు ఎప్పటికీ లీడర్ కాలేరు ....ఫాలోవర్ లు మాత్రమే అవుతారు .

కొంతమంది మనుషులు ఒక విషయం మనల్ని అడుగుతారు ....
మనం ఏదో ఆన్సర్ చేస్తాం .....కానీ ఒక్క నిమిషం అవగానే వాళ్ళు దానిని వినలేరు ....దాని మీద ఫోకస్ చేయలేరు ....అందుకు గల కొన్ని కారణాలు ....
----------------------
ఆ విషయం అడగడం వరకే వాళ్ళు చేస్తారు ....దానికి గల కారణాలు తెలుసుకోవడానికి ఆసక్తి చూపించరు ....
ఒక విషయం మీద ఒక్క నిమిషం వరకే ఆసక్తి చూపించగలరు .....
రెండు పడవల మీద కాళ్ళు పెడతారు ....
వాళ్ళు అడిగిన విషయం , మనము చెబుతున్న విషయం విషయం కాకుండా వేరే విషయం మధ్యలోకి తెస్తారు అకస్మాత్తుగా .....
అసలు అది తెలుసుకుని దానిని అనుసరించడం వారికి ఇష్టం ఉండదు .....
మెదడు లోకి తీసుకోవడం ఇష్టం ఉండదు ....తీసుకోవాలంటే భయం ....
మెదడు ఎప్పుడూ ఒక అభద్రతా భవంలో ఉంటుంది ....ఎవరేం చెప్తారో అని ....
---------------------------------
వాళ్లకి ఎప్పుడూ ఏం చెప్పలేం ....వాళ్ళని మార్చడం అనేది ....వాళ్లకు వాళ్ళు మారడం అనేది ఈ జీవితంలో సాధ్యం కాదు .....😥
ముఖ్యంగా ...ఇతరుల మైండ్ ని మేనేజ్ చేయడం మాట అటుంచి .....వాళ్ళ మైండ్ ని వాళ్ళు మేనేజ్ చేసుకోలేరు ........
అలాంటివాళ్ళు ఎప్పటికీ లీడర్ కాలేరు ....ఫాలోవర్ లు మాత్రమే అవుతారు ....:P

ఇప్పుడు .....నేను ....

ఇదివరకు .......నేను ......
"నువ్ కదల్లేని స్థితిలో ఉన్నప్పుడు లేపి కూర్చోపెట్టాను ....అడుగు వేయలేని స్థితిలో ఉన్నప్పుడు చేయి పట్టుకుని నడిపించాను .....తినలేని స్థితిలో ఉన్నప్పుడు ముద్దలు కలిపి తినిపించాను .....నువ్వు నీ శరీరాన్ని శుభ్రం చేసుకోలేని స్థితిలో ఉన్నప్పుడు .... నీ శరీరం అంతా శుభ్రం చేశాను .... నేను నీకు నా సమయం అంతా ఖర్చుపెట్టాను ....ఇదంతా నేను మనసావాచా చేశాను ......అలాంటివి కూడా గుర్తులేదా .....??!!"
ఇదివరకు..... వాళ్ళు ....
"లేదు నాకెవరూ ఏం చేయలేదు .....నాకు గుర్తులేదు ...."
=========================
ఇప్పుడు ......వాళ్ళు ......
"నేను కదల్లేని స్థితిలో ఉన్నప్పుడు నన్ను చేయిపట్టి నడిపించావు ....తినగలిగిన స్థితిలో కూడా నాకు తినిపించావు.....నా కోసం చాలా చేశావు .....ఎంతో సమయం ఖర్చుపెట్టావు ....గుర్తుందా ....."
ఇప్పుడు .....నేను ....
"లేదు నేను ఎవరికీ ఏం చేయలేదు .....నాకు గుర్తులేదు ...." 🤣

నీ బ్రతుకు నువ్వు ఎలాగైనా బ్రతుకు ....

మీకున్న భయాన్ని ఇతరుల మీద నెడుతున్నారా ....??!!
ఎందుకలా .....??!!
ఎందుకంటే ...,, మీరు మీ బాధ్యతలను సరిగా నిర్వర్తించడం లేదు... అందుకే .... :P
మీరు మీ బాధ్యతలను నిత్యం నిర్వర్తిస్తూ ఉంటే ....మీకు ఏ పని గురించీ భయం ఉండదు ....
---------------------------------
ఉదాహరణకు ....,, ఒక పని చేయడానికి ఒక నెల రోజులు లక్ష్యం ఉందనుకోండి ....ఆ లక్ష్యం మనం నిత్యం తలచుకుంటూ ఉండాలి .....
రోజూ ఆ లక్ష్యం చేరుకోవడానికి అనుగుణంగా అడుగులు వేస్తూ ఉండాలి .....
లక్ష్యం చేరుకోవడానికి ఏ పనులు చేయాలో అవి ఏ రోజు కారోజు పూర్తి చేయాలి .....
అప్పుడు... లక్ష్యం చేరుకునే తేదీ రాగానే ...ఏ భయమూ , ఆందోళన , కంగారు లేకుండా లక్ష్యాన్ని చేరుకోగలం ....
ఒకవేళ చేరుకోలేకపోయినా ....ఎలాంటి భయం లేకుండా మరో తాజా లక్ష్యాన్ని పెట్టుకుంటాం .....
ఈసారి మనకు స్పష్టంగా తెలుస్తుంది ఆ లక్ష్యాన్ని చేరుకోవడానికి ఎంత సమయం పడుతుంది ....ఏం చేయాలి ....ఎలా చేయాలి అని ......
--------------------------------
అదే ఆ లక్ష్యం చేరుకోవడానికి ఒక నెల రోజులు సమయం ఉంది కదా అని ....రోజూ ఇంటర్నెట్ లో సినిమాలు చూస్తూ కూర్చుని .....
ఆ లక్ష్యం చేరుకోవడానికి ఇంకా 10 రోజులు ఉంది కదా అని... చిరంజీవి , బాలకృష్ణ సినిమాలు ఎందుకు హిట్టయ్యాయి ....ఎందుకు ఫట్టయ్యాయి ....వాళ్ళు తిట్టుకున్నారా లేదా పొగుడుకున్నారా ....తిట్టుకుంటే ఎందుకు తిట్టుకున్నారు ....పొగుడుకుంటే ....ఫాన్స్ ఎలా ఊరుకున్నారు ....తదితర విషయాల మీద యు ట్యూబ్ లో రోజూ పనిలేకుండా ప్రసారం చేసే పోరంబోకు వార్తలు చూస్తూ కూర్చుని .....
లక్ష్యం చేరుకోవడానికి ఇంకా రెండు రోజులు ఉందనగా .....ఎలా చేయాలి ఏం చెయాలి అని భయం వేసి ....,,,
చుట్టు పక్కల ఉన్నవాళ్లందరికీ ఫోన్లు చేసి .....
ఎలా ఎలా ఎలా అనే పైశాచిక ప్రశ్నలతో పీక్కు తిని .....వాళ్ళ పని చెడగొట్టి ....వాళ్ళ మెదడుని చితగ్గొట్టి ....
చుట్టు పక్కల వాళ్ళందరూ నువ్వు చేయాల్సిన పనివైపు దృష్టి సారించేలా బెదిరించి .....ఎలాగైనా అందరూ ఆ పని చేసే తీరాలని కండిషన్ పెట్టి .....
వాళ్లకి ఆ పని అప్పచెప్పి .....
ఆనక తీరిగ్గా ....ఆమెకి అది లేదంట .....అతను ఆమెలో ఇది మాత్రమే చూశాడంట ....వాళ్లిద్దరూ వేరు పడ్డారు .....వీళ్ళందరూ ఈ పని చేయలేకపోయారు ....,,,,అనే యు ట్యూబ్ వార్తలను అదే పనిగా చూస్తూ ఉండి ....
ఇతరులు చచ్చి చెడి నువ్వు చేయాల్సిన పనిని కూడా వాళ్ళే చేశాక .....
హమ్మయ్య నా లక్ష్యం పూర్తయింది అని .....అందరికీ ఫోన్లు చేసి మరీ పూర్తి చేసానని సమాచారం ఇచ్చుకుని .....
యు ట్యూబ్ లో ....ఇతను ఆమెని అలా ఉపయోగించుకున్నాడు .....ఆమె అతన్ని అందుకు వాడుకుంది ....అనే దిక్కుమాలిన వీడియోలు చూస్తూ బ్రతుకుతుంటే .....,,,
------------------------------------------
నీ బ్రతుకు నువ్వు ఎలాగైనా బ్రతుకు .......అందుకు ఏ అభ్యంతరం లేదు .... ....
కానీ ఇతరుల బ్రతుకుల్ని "నీ భయం అనే బలహీనత రుద్ది" పీక్కు తినడం ...ఎంతవరకు న్యాయం .....??!!

Thursday, May 25, 2017

మనం మంచి మనుష్యులమా ...చెడ్డ మనుష్యులమా

మనం మంచి మనుష్యులమా ...చెడ్డ మనుష్యులమా అని ....మనకే కొన్నిసార్లు సందేహం కలుగుతూ ఉంటుంది ... :(
సందేహం లేకుండా మనం మంచివాళ్ళమే అని మంచివాళ్ళుగా ఉన్నప్పుడు ....సందేహం లేకుండా మనం చెడ్డ వాళ్ళమే అని చెడ్డ వాళ్ళుగా ఉన్నప్పుడు ... మనం భావిస్తూ ఉంటాం .... :) :P
అయితే సమాజంలో మనం మనుగడ సాగించాలి అంటే మన సహజ స్వభావాన్ని పక్కన పెట్టి ....కొన్ని సార్లు మంచివాళ్ళుగా ....కొన్నిసార్లు చెడ్డ వాళ్ళుగా నటించాల్సి వస్తుంది .....అది చాలా ముఖ్యమైన విషయం .... :)
కొన్ని సార్లు మనం మన పక్కన ఉన్న వాళ్ళ కోసం కూడా ...అంటే మన జీవితాలు వాళ్ళ జీవితాలకు అంకితం చేయాల్సి వచ్చినప్పుడు ....మంచి / చెడ్డ వాళ్ళుగా నటిస్తూ ఉంటాం (జీవిస్తూ ఉంటాం :P ) .....ఇది కూడా ముఖ్యమైన విషయమే ...కానీ ఖచ్చితంగా వేరే టాపిక్ .... :P
మంచి ,చెడు ...లలో ఇదే మన సహజ స్వభావం అని మనకు ఎలా తెలుస్తుంది అనేది ఒక సమాధానం స్పష్టంగా లేని ప్రశ్న ..... ఇది ఎవరి దృష్టిలో అనేది కూడా సమాధానం అస్పష్టంగా ఉన్న ప్రశ్న :( :(
నేనయితే ....,,,,
చిన్నతనం నుండి నేను పెరిగిన వాతావరణం ,పరిస్థితులు , వ్యక్తులు, సమాజం నా మీద చూపే ప్రభావాన్ని పరిగణలోకి తీసుకుని ....నా శరీరం ,మనసు ....ఏ పనులు చేస్తే హాయిగా ,సంతోషంగా ఉంటుందో ....ఆ పనులు ఎక్కువగా చేయడానికి ప్రయత్నిస్తూ ఉంటా .... :) అవే మంచి పనులు అనుకుంటూ ఉంటా .. :)
అంతకు ముందు ఎవరెవరి కోసం ఎలా ఉన్నా ....
గత కొన్ని సంవత్సరాలుగా ....
మంచి పనులే చేస్తూ ,
మంచి ఆలోచనలే ఆలోచిస్తూ ...,
అందరిలో మంచినే చూస్తూ ....,
మంచిగా ....,
మంచిలో బ్రతుకుంటూ ఉంటే ....,,,,నా మెదడు ,మనసు ,శరీరానికి ....చాలా హాయిగా ఉంది .. <3 <3 <3
మళ్లీ అమ్మ ఒడిలో ఉన్నంత సుఖంగా ఉంది .... <3
మల్లె పూల పరిమళం అంత సుమధురంగా ఉంది .... <3
అప్పుడే అనిపించింది ....ఇదే నా అసలు వ్యక్తిత్వం ....మంచితనమే నాకు సరిపడే మనస్తత్వం అని .... :)
కానీ ....అలా నన్ను ఉండనివ్వని సమాజం ....దాన్ని అలుసుగా తీసుకుని చేతగాని తనం అనుకున్నప్పుడు ....తప్పనిసరిగా ....అవసరం అయితే చెడ్డతనం కూడా ప్రదర్శించగలను...అని వాళ్లకి చూపించాల్సి వచ్చినప్పుడు మాత్రం ....,,,,
అలావాటు తప్పిపోయిన మనస్తత్వం మళ్లీ చూపించాలి అంటే ....దానికి చాలా ప్రిపరేషన్ అవసరం ....
అలాంటి ప్రిపరేషన్ నాకు ఈ మధ్య అవసరం అయింది .... :(
కానీ అది ప్రదర్సించాక మళ్లీ నా అసలు వ్యక్తిత్వం లోకి రావడం మాత్రం మర్చిపోలేదు ....పరకాయ ప్రవేశం లాగా ..... :) :P <3

Thursday, May 18, 2017

ఇతరుల్లో మార్పు కోసమే జీవితాన్ని ధారపోస్తారు .

కొంతమంది ....జీవిత కాలం అంతా ...ఎవరో ఒకరిని మార్చాలని , ఎప్పుడో ఒకసారి ఒక్కరిని మార్చినా జీవితం ధన్యం అని,
ఇతరుల్లో మార్పు కోసమే జీవితాన్ని ధారపోస్తారు ..బాగానే ఉంది ....మార్పు కోరుకుంటున్న వాళ్లకు ఇది మంచిదే ....
మరి జీవితం అంతా అయిపోయాక తమ వైపు తాము చూసుకుంటే వాళ్ళు మాత్రం అలాగే ఉంటారు ....తమలో మార్పు గురించి మర్చిపోతారు ....ఇది కూడా బాగానే ఉంది ....అది వాళ్ళ ఇష్టం ....
కానీ ఇక్కడ వచ్చిన చిక్కు ఏమిటంటే ....,మారిన ప్రపంచం అంతా ....ఈ మారని వాడిని అస్సలు లెక్క చేయడం మానేస్తుంది ....
అప్పుడు ఈ మార్పు కోసం ప్రయత్నించిన వ్యక్తి ,జీవితం అంతా ఇతరుల మార్పు కోసమే త్యాగం చేసిన వ్యక్తి ...,ఎవరికీ కాకుండా ఒంటరి వాడై తన మార్పు కోసం పరితపించడం మొదలు పెడతాడు ....ఆల్ ద బెస్ట్ అమ్మా ..... :) :)

అసలు పరిపక్వత అనేది ఎక్కడినుండి వస్తుందా అని ఆలోచిస్తే ..

ఆమె /అతను వారి ప్రవర్తనలో చాలా పరిపక్వత కలిగి ఉంటారు .....అని అంటూ ఉంటారు ....కొందరు కొందరిని ఉద్దేశించి .....
అసలు పరిపక్వత అనేది ఎక్కడినుండి వస్తుందా అని ఆలోచిస్తే ....అది అపరిపక్వత లో నుండే వస్తుంది అని నా స్వీయ పరిశీలన ద్వారా నాకు అర్ధమైంది ...
అంటే "అ" అనే అక్షరం తీసేస్తే వచ్చే పరిపక్వత కాదు ....
మన ప్రవర్తన చాలా సార్లు అపరిపక్వతకు గురై ....అందులో నుండి పరిపక్వ ప్రవర్తన రూపు దిద్దుకుంటుంది అని
....
---------------------------------------
ఉదాహరణకు …..,,,
- మనకు ఒక కష్టం వచ్చింది అనుకుందాం ....మనం ...కంగారు పడతాం , బాధ పడతాం , ఏడుస్తాం , లేదా డిప్రెషన్ లోకి వెళ్తాం ....
ఈ కష్టం నాకే ఎందుకు వచ్చింది అనుకుంటాం .....భగవంతుడిని నిందిస్తాం ....అందుకు కారణమైన వాళ్ళని , చివరకు మనకు మనం కూడా తిట్టి పోసుకుంటాం ....వీలైతే ఆరోగ్యం కూడా పాడు చేసుకుంటాం ...
తర్వాత ...సాధారణంగా ..ఆ బాధలో నుండి కోలుకోవడానికి కాస్త సమయం పడుతుంది ....
బాధ తాలూకు గాయాలు ,జ్ఞాపకాలు మర్చిపోయాక ...ఆలోచిస్తాం ....
అరె ఆ కష్టం వలెనే కదా ......ఈ జీవిత సత్యం నేర్చుకున్నాం అనిపిస్తుంది ...ఆ కష్టం తాలూకు బాధ ని అనుభవించడం వలెనే కదా అలాంటి బాధ తాత్కాలికమే శాశ్వతం కాదు అని , ఆ తర్వాత ఆనందం అనేది రాక మానదు అని తెలిసింది అనిపిస్తుంది ....ఏది ఏమైనా ఈ సారి అలాంటి కష్టం ఎదురైతే ఇంతకు ముందు అంత బాధ పడకూడదు .....అని నిర్ణయించుకుంటాం....
- తర్వాత అలాంటి కష్టమే మళ్లీ వస్తుంది .....ఇంతకు ముందు అనుభవించిన అనుభవాల జ్ఞాపకాలు గుర్తొచ్చినా ...ఇంతకు ముందు అంత బాధకు గురి కాకపోయినా ...మళ్లీ ఎంతో కొంత బాధను అనుభవిస్తాం ....ఛా ...ఇలా చేయకూడదు అని అనుకున్నా కూడా చేయకుండా ఉండలేకపోయా ....ఏమైనా ఈసారి ఈ విషయంలో కాస్త పరిపక్వత ప్రదర్శించాలి అని ....మరికొన్ని లాభ నష్టాలను ...బేరీజు వేసుకుని ....అందులో నుండి బయట పడతాం ....
- మరి కొన్నాళ్ళకి సహజంగానే ....ఆ కష్టం రాక మానదు (అలాంటిదే మరొకటి)....ఈ సారి ఎలాంటి బాధా లేకుండా ....ఇది సహజం ....తాత్కాలికం అనుకుని ...దానిని చిరునవ్వుతో ఎదుర్కొని ...వీడ్కోలు చెబుతాం ...
- చివరకు ఎలా అవుతుంది అంటే ....అలాంటి కష్టం రాగానే ....
చిరునవ్వుతో ఆహ్వానిస్తాం ....
అంతే చిరునవ్వుతో భరిస్తాం .....
చిరునవ్వుతో వెళ్లి పొమ్మంటాం ....
...................................................
చూసిన వాళ్లకు వీళ్ళెంత పరిపక్వమైన ప్రవర్తన కలిగి ఉన్నారు అనిపిస్తుంది ....అంతెందుకు ....మనకే అలా అనిపిస్తుంది ....
ఒకప్పుడు ఇదే సమస్య వచ్చినప్పుడు ఎంత అపరిపక్వ ప్రవర్తన కలిగి ఉన్నాను అని.... ఎన్నిసార్లు మనం ఆ సమస్యలో నలిగి పోయి ఇది సాధించాం అని ఆలోచిస్తే ...
అపరిపక్వ ప్రవర్తనలో నుండి పరిపక్వ ప్రవర్తన సాధించినట్టు అర్ధమవుతుంది ..... !! :) :)

Sunday, May 14, 2017

నేను నేనే ....

నువ్వెన్ని అబద్ధాలు చెప్పినా ....అవి అబద్ధం అని నాకు అణువంత అనుమానం రాదు ....అవి నిజాలే అని నమ్మి ....ఆనక అబద్ధాలని తెలుసుకుని నువ్వు అబద్ధాల కోరువి అని నిర్ణయించుకుంటా ....కానీ మళ్ళీ నువ్వు అబద్ధం చెప్పినప్పుడు నమ్మడం మాత్రం మర్చిపోను ....అందుకే నేను నేనే ...😎

నేనెన్ని నిజాలు చెప్పినా ....అవి నిజం అని నీకు అణువంత నమ్మకం రాదు .....అవి అబద్ధాలే అని నమ్మి ....ఆనక నిజాలని తెలుసుకుని నేను నమ్మకాల మేరుని అని నిర్ణయించుకుంటావు ....కానీ మళ్ళీ నేను నిజం చెప్పినప్పుడు అనుమానించడం మాత్రం మర్చిపోవు ....అందుకే నువ్వు నువ్వే ...🤔

మాతృ హృదయం ఉన్న పురుషుడు ఈ రోజుల్లో కూడా ఇంకా ఎక్కడో ఉన్నాడేమో అని ఆశ కలుగుతుంది ....

చరిత్ర చూసి మనం కొన్ని విషయాలు నేర్చుకుని ...అవి వర్తమానంలో ఉన్న విషయాలతో పోల్చుకుంటాం .........
ఏవి పునరావృతం కావాలి ....ఏవి కాకూడదు ....మానవాళి మనుగడకు ఏది నష్టం ఏది లాభం అని నిర్దేశించేది చరిత్రే ....అసలు అందుకే చరిత్ర మనం చదువుకోవాలి కూడా ....
అయితే వర్తమానం చూసి కూడా కొన్ని విషయాలు నేర్చుకుని..అవి మనం చరిత్రతో పోల్చుకుని నేర్చుకోవచ్చు ....వర్తమానంలో ఉన్నవాళ్లు ఎందుకు అలా చేస్తున్నారు .....దానివెనుక ఉన్న కారణాలేమిటి ...అది ఎలా ఇప్పటి జీవన విధానానికి అన్వయించుకోవాలి .... అనేవి.. కొన్ని పరిశోధనలకు అందవు ....
అవి మనం, మన అనుభవాల్లో నుండి వెలికి తీసి ....సరికొత్త అర్ధాలను అన్వయించుకుని ...మనకు అనుకూలంగా మార్చుకోవచ్చు .....చరిత్ర అందుకు కూడా ఉపయోగపడుతుంది .....
ఇదే భవిష్యత్ చరిత్ర అవుతుంది .....

బహుశా అప్పటి వర్తమానంలో కూడా కొన్ని, అంతకు ముందు ఉన్న చరిత్ర నుండి వచ్చి ఉండొచ్చు ....
ఏది ఏమైనా అదలా ఉంచితే ....ఈ వర్తమానంలో మనం ఒక విషయం తెలుసుకుని తీరాలి అని అర్ధమైంది .....
=========================
"ఆదిమ కాలంలో ఎవరో ఒక పురుషుడు, మాతృ హృదయం అర్ధం చేసుకుని ఉంటాడు .......అందుకే స్త్రీకి ఇంటి పని , పిల్లల పని అప్పగించి ....తను వేటకు వెళ్లి .... ఆహారం వేటాడి తెచ్చేవాడు ....బయటకు వెళ్లి చూసుకోవాల్సి వచ్చిన పనులన్నీ తానే చూసుకునేవాడు ...." అని 
ఆమె బలహీనురాలు అని కాదు ....పిల్లలను వదిలి వెళ్లాల్సి వస్తే ఆమె కన్నపేగు ఎక్కడో కదులుతుంది ....ఆ కదలికకు ఆమె శరీరం కంపిస్తుంది ....ఆ నొప్పిని ఆమెకు కలిగించడం అంటే ....ఓ రకంగా ఆమెను బాధ పెట్టడమే అని ....ఎప్పుడో, ఎక్కడో ... తను అర్ధం చేసుకున్నాడు ....
పిల్లల అవసరాలు తల్లికి తెలిసినంతగా తను తెలుసుకోలేడు అని, ఒకవేళ తెలుసుకున్నా ఆమె చేసినంత శ్రద్ధగా, ప్రేమగా, భక్తిగా తను చేయలేను అని ....అర్ధం చేసుకుని ఉంటాడు ...
అందుకే ఆమెను పిల్లల దగ్గరే ఉంచి ...తను ఆహార అన్వేషణకు వెళ్లి , దానికి కాల క్రమేణా సంప్రదాయం అని పేరు పెట్టాడు ....
తర్వాత దానినే ....తమ అవసరాలకు అనుగుణంగా ......లేదా పురుషుడు లేని సమయంలో , లేదా పురుషుడు ఆదరించని సమయంలో ....తప్పనిసరై పిల్లల పోషణ బాధ్యత తల్లి తీసుకుని ....పిల్లలని వదిలి ఉదర పోషణ నిమిత్తం తల్లి ఆహార అన్వేషణకు వెళ్లాల్సి వచ్చేది ....
ఆ తర్వాత కథ మీకు తెలిసిందే ....
కొందరు పురుషులు స్త్రీని ....
నువ్వు అబలవి కాబట్టి ఇంటిదగ్గర ఉండు అన్నాడు....
నువ్వు ఎందుకూ పనికిరాని దానివి కాబట్టి ఇంటి దగ్గర ఉండు అన్నాడు
....
అందమైన సంప్రదాయాన్ని లోప భూయిష్టం , స్వార్ధహితం చేసి ...మేం చెప్పిందే సంప్రదాయం అన్నాడు .....
నువ్వు పిల్లల్ని చూసుకోవడానికి తప్ప ఎందుకూ పనికిరావు అని ....బయట పనులు నువ్వు చేయలేవు , చేతకాదు అని అవమానించాడు ... ....
ఆమె ఇంటిదగ్గర ఉండి చేసే పనులన్నీ విలువ లేనివిగా తద్వారా ఆమె విలువ లేనిదిగా చిత్రీకరించాడు....
నేను బయటకు వెళ్లి సంపాదిస్తున్నాను కాబట్టి ...నీకు, నీ పిల్లలకు తిండికి బట్టకు అవసరమైనంత ఇచ్చి ....మిగతా డబ్బు నా ఇష్టం వచ్చినవాళ్లకు ఇచ్చుకుంటా అన్నాడు ....
సంపాదించిన డబ్బు నేను సంపాదిస్తున్నా కాబట్టి ఏమైనా చేసుకునే హక్కు నాకుంది అన్నాడు ....
ఇంకా కొందరు ...ఎంతమందితో అయినా సంబంధాలు పెట్టుకునే హక్కు నాకుంది ....కాదని అంటే నీ పిల్లలు, నువ్వు ఇల్లు వదిలి వెళ్ళండి అన్నాడు ....
పిల్లలు అనేది ఆమె బలహీనతగా అనుకుని ....ఆమె ను బంధించాను అనుకుని ....తను విచ్చలవిడితనం నేర్చుకున్నాడు ....
ఇలా చెప్పుకుంటూ పొతే ....అతని అక్రమాలకు అంతే లేకుండా పోయింది ....
ఇంత జరిగినా ...స్త్రీ పురుషుడి గురించి ఆలోచించలేదు ....తన కన్నపేగు గురించే ఆలోచించింది ....అతనితో పోరాడింది ....బ్రతిమాలింది ....కాళ్ళా వెళ్ళా పడింది ....తన పిల్లలకు అన్యాయం చేయొద్దు అని అర్ధించింది ....సంప్రదాయాన్ని ప్రశ్నించింది ....అపార్ధం చేసుకుంది ....అసహ్యించుకుంది ....
చివరకు ....ఆమె పురుషుడు చేసే పని తను ఎందుకు చేయలేను అని ఆలోచించింది ....తను బయటకు వెళ్లి అవకాశాల కోసం ప్రయత్నించింది ....అలవాటు లేని పని నేర్చుకుంది ....అవమానాలను భరించింది ....తన పిల్లలకు కూడా ముందు జాగ్రత్త చర్యలు నేర్పించింది ....అదే అనుసరించాల్సిన జీవన విధానం అని అర్ధం చేసుకుంది ....అదే మనుగడకు అనివార్యం అని భావించింది ....
=======================
కానీ ఎక్కడో ....ఏమూలో ...
పిల్లలని సంరక్షణాలయాల్లో వదులుతున్నప్పుడు ....ఆయాల దగ్గర వదిలి ఆఫీస్ కి బయలుదేరినప్పుడు ....పొలంలో చెట్టుకు వేళ్ళాడుతున్న గుడ్డ ఉయ్యాలలో వదులుతున్నప్పుడు ....కర్మాగారాల్లో ఓ మూలన గుక్కపట్టి ఏడుస్తున్నప్పుడు ........చిన్నపిల్లల బాధ్యత పెద్ద పిల్లలకు అప్పగించినప్పుడు ....ఇంట్లో వదిలి వేరే ఊరుల్లో ఉద్యోగాల కోసం వెళుతున్నప్పుడు ....
ఇంకా కడుపులో కలుక్కుమంటుంది ....కన్నపేగు కోతకు గురవుతుంది ....గుండెల్లో బాధ మెలి తిప్పుతుంది ....
ఆమె కన్న పేగు కోతను అర్ధం చేసుకునే మాతృ హృదయం ఉన్న పురుషుడు ఈ రోజుల్లో కూడా ఇంకా ఎక్కడో ఉన్నాడేమో అని ఆశ కలుగుతుంది ....అలాంటి వాళ్ళు ఎవరైనా ....Happy Mother's Day అని చెప్తే వినాలని ఉంది... <3

Friday, May 12, 2017

ఈ GPS జాబ్ 20 ఏళ్ళ నుండి చేస్తున్నా ....

సమయం అర్ధరాత్రి పన్నెండు అయింది ....
వాషింగ్టన్ ఎయిర్ పోర్ట్ నుండి బయటకు వచ్చా ...
కొద్దిగా చలిగా అనిపించింది ....
ఫ్లైట్ లాండ్ అవగానే ...మావారు కారు తీసుకుని వస్తాను అన్నారు కదా అని ఫోన్ చేశా ....
"అప్పుడే వచ్చేసిందా ఫ్లైట్ ...ఇప్పుడే బయలుదేరాను ....అరగంటలో అక్కడ ఉంటాను ...."అన్నారు ఆశ్చర్యంగా....
"కంగారేం లేదు ...నెమ్మదిగా రండి ....నేను వెయిట్ చేస్తాను ..." చెప్పా ..
కాసేపట్లో మళ్ళీ ఫోన్ ....."కార్ కీస్ ఎక్కడ పెట్టానో కనిపించలేదు ....వెతుకుతున్నాను ...పాప నిద్రపోయింది ....తన రూమ్ లో ఉన్నట్టున్నాయి .." అవతలి నుండి మావారు ....
"పర్వాలేదు ....వెతకండి ....తర్వాత కాల్ చేయండి ....ఎక్కువ ఛార్జింగ్ లేదు నా ఫోన్ లో ...." చెప్పా ....
మళ్ళీ కాసేపాగాక ....మళ్ళీ ఫోన్..."కీస్ కనిపించలేదు ...." తన గొంతు ....
"పర్వాలేదు ....నేను కాబ్ తీసుకుని వస్తా ...." నవ్వుతూ చెప్పా ....
ఎవరో నా కోసం రావాలని , వస్తారని నేను ముందుగానే ఊహాగానాలేవీ చేయకపోవడం వలన ...నాకు అదేం పెద్ద సమస్యగా అనిపించలేదు ....
"కాబ్ బుక్ చేస్తాను ..." చెప్పారు ...
కాసేపటికి కాబ్ వచ్చింది ....ఎక్కి కూర్చున్నా ....
ఇంటికి రావడానికి అరగంట పడుతుంది ....
'హౌ అర్ యు డూయింగ్ " అడిగాడు కాబ్ డ్రైవర్ ....
"ఫైన్ ...థాంక్స్ " అన్నా ....
మళ్ళీ బయల్దేరాక 'హౌ అర్ యు డూయింగ్ " అన్నాడు ...
ఓర్నీ ...ఇప్పుడే కదా చెప్పా ....బాగానే ఉన్నాను ....అని ....మళ్ళీ ఏంటి అనుకుని ....
మళ్ళీ "ఫైన్ థాంక్స్" అన్నా ....
ఎందుకో అతను నేను చెప్పింది వినిపించుకున్నట్టు కూడా లేదు ....
పొద్దుటినుండి ప్రయాణం ..నేనూ అలసిపోయి ఉన్నా ....అందుకే అతన్ని కదిలించలేదు .....
ఎవరూ ఒకరి మీద ఒకరు ఆధారపడకుండా .....స్వతంత్రంగా బ్రతకడానికి దోహదపడేలా పుట్టుకొచ్చిన కొత్త వింతల్లో ఈ ఊబర్ ఒకటి .....App ఫోన్ లో డౌన్ లోడ్ చేసుకుని ...క్రెడిట్ కార్డు నంబర్ ఇచ్చి ....ఎక్కడికి పోవాలో అడ్రస్ చెప్తే చాలు ....మనం ఉన్న చోటు కూడా వాడే కనుక్కుని ఎంచక్కా ఎక్కించుకుని పోయి ....అక్కడి కెళ్ళాక ఒకరేటు , ఎక్కినప్పుడు ఒకరేటు అని ....చిల్లర లేదని ....ఇలాంటి పేచీలు లేకుండా ....ముందే ఎంత అవుతుందో చెప్పేస్తాడు .....
మనం కాబ్ ఎక్కాక మనల్ని చక్కగా మాట్లాడించడం ఎందుకు చేస్తాడు అంటే ....దిగాక మంచి రేటింగ్ ఇస్తామని ....(ఇప్పుడు ఇది తీసేసాడు అనుకోండి )
అందులో భాగంగానే పాపం అతను నన్ను పలకరించాడు ....
నేనూ అతనికి సమాధానం చెప్పా .....
కానీ అతనిలో / నాలో ఒకటే లోపించింది ....హుషారు ....
ఒకటి మాత్రం పుష్కలంగా కనిపించింది ....నీరసం .....
సరేలే .... అని ....అలసి పోయి ఉండడం వలన కళ్ళు మూసుకుని కాసేపు తల వెనక్కి వాల్చా ...
పక్కనే లైట్ గా మ్యూజిక్ వినిపించింది ....ఏంటా అని చూశా ....పాటలు హెడ్ ఫోన్స్ లో పెట్టుకుని వింటున్నాడు డ్రైవర్ ....
అప్పుడు చూశా అతనివైపు ....ఓ పాతికేళ్ళు ఉంటాయనుకుంటా ....
స్టూడెంట్ లా అనిపించాడు .......
సాధారణంగా అలా పాటలు వినకూడదు డ్రైవ్ చేసేటప్పుడు ....పోనీలే పాపం పొద్దుటినుండి కాబ్ నడుపుకుని అలసిపోయి ఉన్నాడేమో అనుకున్నా .....
మళ్ళీ ...ప్రకృతిని ఆస్వాదించడంలో మునిగిపోయా ....
అప్పుడు అనిపించింది ....చాలామంది రాత్రిపూట ప్రకృతిని ఏం చూస్తాం అనుకుంటారు కానీ ....రాత్రి మాత్రం ప్రకృతి ఎందుకు అందంగా ఉండదు అనిపించింది .....
జుట్టు విరబోసుకున్న దయ్యాల్లా రోడ్డుకిరుపక్కలా చెట్లు పగలు కనిపించవు కదా ....ఆకాశం సగం చీకటి సగం వెలుగు నింపుకుని ముసురేసినట్టు కనిపించింది .....డైరెక్షన్ బోర్డులు అప్పుడప్పుడూ మెరుస్తూ చదివేలోగా మాయం అవుతూ ....ఎంతో విచిత్రంగా చూస్తూ ఉండిపోయా ....ఎందుకో ప్రకృతి ని చూడడం ఎన్నిసార్లు చూసినా నాకు ఎప్పుడూ విసుగనిపించదు .... <3
అంతలో ....పక్కన ఆ పిల్లాడు కాస్త అటూ ఇటూ ఊగుతూ .....రెండు లేన్లు మధ్యలో కారు నడుపుతున్నాడు .....
వెనక నుండి ఎవరైనా స్పీడ్ గా వస్తే ....??? అనిపించింది
స్టీరింగ్ మీద చేతులు చాలా నిర్లక్ష్యంగా మార్చి మార్చి వేస్తున్నాడు ....
నాకు అర్ధమైంది ....ఈ పిల్లాడికి పాపం కాబ్ నడపడం ఇష్టం లేదు ,,,,కానీ బ్రతుకు తెరువు కోసం తప్పదు అని నడుపుతున్నాడు అనుకుంటా ....
ఒక్క క్షణం జాలేసింది....పోన్లే ఎలా అయినా నడపనీ ....ఎలాగైనా ఏదో ఒక పని చేసుకుని బ్రతకాలని ఆరాటం గొప్పది కదా అనుకున్నా ....
అంతలో "take this exit'అన్నా ....ఒక్కసారిగా ....
" ఓ సారీ ....' అని ఒక్క క్షణంలో.. మిస్సవ్వ బోయిన ఎగ్జిట్ తీసుకున్నాడు ....
ఎగ్జిట్ మిస్సయితే మళ్ళీ ఓ పదినిమిషాలు తిప్పి తిప్పి చంపుతుంది ....GPS...
హమ్మయ్య అనుకున్నా .....
ఇక తప్పదు అని ....మళ్ళీ GPS డ్యూటీ వచ్చింది అని ....ఎలర్ట్ అయ్యా ....
"go straight, use local lanes, take next exit, take right"
ఇలాంటివి చెప్తూ మొత్తానికి ఇంటికి వచ్చా .....
మధ్యలో .....ఏం చేస్తున్నావ్ ....చదువుకుంటున్నావా అడిగా ....
లేదు మానేశాను ....అన్నాడు ....ఇక్కడికి కాబ్ నడుపుకోవడానికి వచ్చా అన్నాడు ...ఎక్కడినుండి వచ్చావ్ అని అడిగా ....టర్కీ నుండి అని చెప్పాడు ....
చీకట్లో కూడా రోడ్లన్నీ గుర్తుపెట్టుకుని మరీ చెబుతుంటే ....అడిగాడు ...."ఎన్నేళ్ల నుండి మీరు ఇక్కడ ఉంటున్నారు" అని ....
"ఉంటుంది తక్కువే ....కానీ ఈ GPS జాబ్ 20 ఏళ్ళ నుండి చేస్తున్నా ...."నవ్వుతూ చెప్పా ....
=====================
ప్రతి ఒక్కరి వెనుకా ఒక జీవితం ఉంటుంది ....ప్రతి జీవితం వెనుకా ఒక కథ ఉంటుంది ..... ప్రతి కథ వెనుకా ఒక బ్రతుకు పోరాటం ఉంటుంది ....అది అర్ధం చేసుకుంటే ....అస్సలు కోపం అనేదే రాదు ఎవరిమీదా ....
ఈ రోజు నాకు ఎవరి మీదా కోపం రాలేదు ....అందుకే చాలా సంతోషంగా అనిపించింది ...... <3 <3

అజాగ్రత్తగా నడిపే వాళ్ళ నుండి ....ఎలా బయటపడాలో నేర్పించడం

జీవితంలో మొదటిసారి ఈ రోజు నా చిన్న కూతురి డ్రైవింగ్ లో నాలుగు గంటలు ప్రయాణం చేశా ... <3
"చాలా బాగా నేర్చుకున్నా / చేస్తున్నా కదా ...." అడిగింది నా అభిప్రాయం కోసం ....
"చాలా బాగా చేస్తున్నావు నాన్నా ...." చెప్పా ... <3
అయినా అవకాశం దొరికినప్పుడు ....జాగ్రత్తలు చెప్పడం మాత్రం మర్చిపోలేదు .....
ఈ రోజుల్లో పిల్లలకు డైరెక్ట్ గా సలహాలు ఇస్తే నచ్చదు ....అది సలహా అని అనిపించకుండా ...."అలా చేస్తే బాగుంటుంది అని .....ఇలా నేను ఎప్పుడూ చేస్తూ ఉంటా , కంఫర్ట్ గా ఉంటే నువ్వు కూడా ఫాలో అవ్వొచ్చు .....ఈ పద్ధతి ఫాలో అవడం వలన ఈ ఉపయోగాలు / లాభాలు ఉండొచ్చు ....." ఇలా చెప్పాలి ..... :P
విపరీతమైన వర్షం ....విండ్ షీల్డ్ వైపర్స్ ఫుల్ స్పీడ్ లో ఉన్నాయి .....పక్కనే ఉన్నాను కాబట్టి నేనే తనకు రెస్పాన్సిబుల్ డ్రైవర్ ....ఇంకా తనకు లెర్నర్ పర్మిట్టే కాబట్టి ....
అంతలో ఒక ట్రక్ డ్రైవర్ ....ముందు వెళుతూ ఫాస్ట్ గా వెళ్లడం లేదు ... ....అది డబల్ లైన్ హైవే ...పక్క లైన్ లో కూడా ఒక కార్ వెళ్తుంది ...
"మనకు దారి ఇవ్వట్లేదు ....ఫాస్ట్ గా వెళ్లట్లేదు ....హార్న్ చేయనా" అడిగింది ....
'వద్దు వద్దు .....వర్షంలో స్లో గా వెళ్లడం తప్పులేదు ...." చెప్పా
"అయితే అతను రైట్ లేన్ కి వెళ్ళాలి .....లెఫ్ట్ లేన్ లో ట్రక్ ఇలా వెళ్ళకూడదు ....మనం హార్న్ చెయ్యొచ్చు ...." చెప్పింది ....
"వద్దు కొద్దిగా వెయిట్ చెయ్యి ....పర్లేదు ....." చెప్పా ....
అంతలో పక్క లేన్ ఖాళీ అయింది ....
"పక్కకి వెళ్లి ఓవర్ టేక్ చెయ్యి ....." చెప్పా ...
పక్కకి వెళ్లి ఓవర్ టేక్ చేసింది .....
నిజానికి రైట్ లేన్ లో ఉన్నవాళ్లను ఓవర్ టేక్ చెయ్యొచ్చు కానీ ....లెఫ్ట్ లేన్ లో ఉన్నవాళ్లను ఓవర్ టేక్ చేసి వాళ్ళ ముందుకు వెళ్లడం అంటే వాళ్ళను కించపరచడం లాంటిది ఇక్కడ ....
తప్పనిసరై వెళ్లాల్సి వచ్చింది కాబట్టి ....అర్ధం చేసుకుంటాడులే ....అనుకున్నా ...
కానీ కొంతసేపట్లో ....అతను కోపంతో మా పక్కకు వచ్చి ....మా కారుకి సమానంగా కావాలని మా లేన్ లోకి వస్తూ నడపడం మొదలు పెట్టాడు ......
అది ట్రక్ ....ఇది కార్ ...పైగా నా కూతురు డ్రైవింగ్ కి కొత్త .....
"వీడు కావాలని ఇలా చేస్తున్నాడు ....." కంగారుగా చెప్పింది నా కూతురు ....
"అర్ధమైంది .....నువ్వు అదే స్పీడ్ కంటిన్యూ చెయ్యి ...." చెప్పా పైకి నెమ్మదిగా ....
"ఇలాంటి వాళ్ళను మామూలుగా మడతపెట్టకూడదు ...." మనసులో అనుకున్నా ...
ట్రక్ మా ముందుకు తేవడానికి ప్రయత్నించాడు .....
"చోటివ్వకు ....ముందు కారుకి నీ కారుకి మధ్యలో స్పేస్ లేకుండా కంటిన్యూ చెయ్యి ...." చెప్పా ....
కాస్త ముందుకి వెళ్ళాక ట్రాఫిక్ క్లియర్ అయింది ....
ట్రక్ / కార్ రెండే ఉన్నాయి ....
"ఇప్పుడు 85 కి పెంచు స్పీడ్ " చెప్పా ....🚗
సాధారణంగా ....ట్రక్ ఎంత స్పీడ్ గా వచ్చినా కారుతో రాలేదు కాబట్టి ....10 నిమిషాల్లోనే కనుమరుగైపోయింది ....
"ఇప్పుడు కాస్త స్పీడ్ తగ్గించు ...."చెప్పా ....😎
కొందరు ....డ్రైవింగ్ లో కూడా వాళ్ళ పొగరుమోతు బుద్ధి పోనిచ్చుకోరు ....👿
సాధారణంగా నేను అలాంటి పోటీలు ఎప్పుడూ పెట్టుకోను....కానీ కావాలని ఓవర్ టేక్ చేయకపోయినా ....చిన్నపిల్ల మీదకు ట్రక్ తీసుకుని వస్తే .... ఎలా ఎదుర్కోవాలో నేర్పించకుండా మాత్రం ఎలా ఉంటాను ....??!!
తప్పనిసరిగా అది కూడా ట్రైనింగ్ లో భాగమే ....
అందుకే.... కొన్నిసార్లు మనం జాగ్రత్తగా ఉన్నా ...ఎదుటివాడు మీద మీదకు వచ్చినప్పుడు ....ఎలా నిబ్బరంగా బయటపడాలో నేర్పించా ....
జాగ్రత్తగా ఎలా నడపాలో నేర్పించడం .....అజాగ్రత్తగా నడిపే వాళ్ళ నుండి ....ఎలా బయటపడాలో నేర్పించడం రెండూ అవసరమే కదా.....??!!🤔